Actions

कबधौं मिलै मोहि श्रीगुरु मुनिवर

From जैनकोष

कबधौं मिलै मोहि श्रीगुरु मुनिवर, करि हैं भवोदधि पारा हो ।।टेक. ।।
भोगउदास जोग जिन लीनों, छाँडि परिग्रहभारा हो ।
इन्द्रिय दमन वमन मद कीनो, विषय कषाय निवारा हो।।१ ।।कबधौं. ।।
कंचन काँच बराबर जिनके, निंदक बंदक सारा हो ।
दुर्धर तप तपि सम्यक निज घर, मनवचतनकर धारा हो।।२ ।।कबधौं. ।।
ग्रीषम गिरि हिम सरिता तीरै, पावस तरुतल ठारा हो ।
करुणाभीन चीन त्रसथावर, ईर्यापंथ समारा हो।।३ ।।कबधौं. ।।
मार मार व्रत धार शील दृढ़, मोह महामल टारा हो ।
मास छमास उपास वास वन, प्रासुक करत अहारा हो।।४ ।।कबधौं. ।।
आरत रौद्रलेश नहिं जिनके, धर्म शुकल चित धारा हो ।
ध्यानारूढ़ गूढ़ निज आतम, शुधउपयोग विचारा हो।।५ ।।कबधौं. ।।
आप तरहिं औरनको तारहिं, भवजलसिंधु अपारा हो ।
`दौलत' ऐसे जैन-जतिनको, नितप्रति धोक हमारा हो।।६ ।।कबधौं. ।।