GP:प्रवचनसार - गाथा 214 - तत्त्व-प्रदीपिका



अथ श्रामण्यस्य परिपूर्णतायतनत्वात्‌ स्वद्रव्य एव प्रतिबन्धो विधेय इत्युपदिशति -

एक एव हि स्वद्रव्यप्रतिबन्ध उपयोगमार्जकत्वेन मार्जितोपयोगरूपस्य श्रामण्यस्य परिपूर्णतायतनं, तत्सद्भावादेव परिपूर्णं श्रामण्यम्‌ । अतो नित्यमेव ज्ञाने दर्शनादौ च प्रतिबद्धेन मूलगुणप्रयततया चरितव्यं, ज्ञानदर्शनस्वभावशुद्धात्मद्रव्यप्रतिबद्धशुद्धास्तित्वमात्रेण वर्तितव्यमिति तात्पर्यम्‌ ॥२१४॥